ევროპასა და საქართველოში ივლისში რეკორდული რაოდენობის ფრენა დაფიქსირდა

ევროკონტროლის ქსელის მასშტაბით, რომელშიც საქართველოც შედის, ისტორიაში პირველად, თვის განმავლობაში ერთი მილიონი ფრენა დაფიქსირდა. 2016 წლის მონაცემებთან შედარებით, ფრენების რაოდენობა 5%-ით გაიზარდა. ივლისში ევროპის საჰაერო სივრცეში დაახლოებით 35 000 ფრენა სრულდებოდა. მემილიონე ფრენა 31 ივლისს, შუადღისას შესრულდა.

საქართველოს საჰაერო სივრცის ფარგლებში ფრენების რაოდენობის რეკორდული რიცხვი დაფიქსირდა 2017 წლის 28 ივლისს. შპს “საქაერონავიგაცია” ამ დღეს 537 ფრენას (ინსტრუმენტალური + ვიზუალური ფრენები) მოემსახურა. ფრენების ზრდის ტენდენცია ფიქსირდება არამარტო ივლისის თვეში, არამედ გასული 6 თვის განმავლობაში. საქართველოში ფრენების რაოდენობა გასულ წელთან შედარებით 13,6%-ით არის გაზრდილი.


„ევროპის საჰაერო მოძრაობის მართვის სისტემა ფრენების რეკორდულ რაოდენობას ემსახურება. ეს კი ცხადყოფს, თუ რამდენად მნიშვნელოვანია პან-ევროპული ქსელის მიდგომა დატვირთული საჰაერო სივრცეების სამართავად. ევროკონტროლი, როგორც ქსელის მენეჯერი მთელი ევროპის მასშტაბით და მის საზღვრებს გარეთაც მუშაობს პარტნიორებთან, რათა წლის განმავლობაში მილიარდზე მეტი მგზავრის ეფექტური გადაადგილება უზრუნველყოს.“ -აცხადებს ქსელის მენეჯერის დირექტორი ჯო სულთანა.

Advertisements

საქართველოს საჰაერო სივრცის დატვირთვა 15%-ით გაიზარდა

2017 წლის 4 თვის სტატისტიკური მონაცემების მიხედვით, საქართველოს საჰაერო სივრცეში ფრენების რაოდენობა 15%-ით არის გაზრდილი.

მიმდინარე წლის I კვარტალში, წინა წლის ანალოგიურ პერიოდთან შედარებით, 15%-თ მოიმატა საქართველოს საჰაერო სივრცის გამოყენების რაოდენობამ. 4 თვის განმავლობაში შპს “საქაერონავიგაცია” 41 914 საჰაერო ხომალდს მოემსახურა, რაც 15%-ით მეტია გასულ წელთან შედარებით. გაიზარდა როგორც საქართველოს აეროპორტებში მომფრენი და გამფრენი, ასევე სატრანზიტო რეისების რაოდენობაც.

2017 წლის იანვარ-აპრილის განმავლობაში საქართველოს აეროპორტებში შესრულებულია 9 618 ინსტრუმენტალური ფრენა, რაც გასული წლის იმავე პერიოდის მაჩვენებელზე 2 544 ფრენით, ანუ 35%-ით მეტია.

2017 წლის იანვარ-აპრილის პერიოდში ასევე გაიზარდა ტრანზიტული რეისების რაოდენობაც და 31 426 ფრენა შეადგინა, რომელიც 2016 წლის იმავე პერიოდის მაჩვენებელზე 2 166 ფრენით, ანუ 7%-ით მეტია.

2017 წლის I კვარტალში საქართველოს საჰაერო სივრცეში ნაფრენი დისტანცია 12 989 259 კმ-ს შეადგენს, რაც 2016 წლის იმავე პერიოდის მაჩვენებელზე 574 953 კმ-ით მეტია.

“ბოლო წლებში მნიშვნელოვნად იზრდება უცხოური ავიაკომპანიების დაინტერესება საქართველოს საჰაერო სივრცით. ამას განაპირობებს საქაერონავიგაციის მიერ ოპტიმალურად დაგეგმილი მარშრუტები, უმაღლესი სტანდარტის სანავიგაციო ტექნოლოგიებით და უახლესი შუქ-ტექნიკით აღჭურვილი აეროპორტები და ევროპული დონის სერვისი, რომელსაც ჩვენ ავიაკომპანიებს ვთავაზობთ. ფრენების ზრდის ტენდენცია მნიშვნელოვანი გამოწვევების წინაშე გვაყენებს და ამიტომ, 2017 წელს კომპანიის პრიორიტეტად კვლავაც რჩება საერთაშორისო სტანდარტებთან შესაბამისი სისტემების დანერგვა, თანამშრომელთა კვალიფიკაციის დონის კიდევ უფრო ამაღლება და  ამ ტენდენციის შენარჩუნება.”, – აცხადებს შპს საქაერონავიგაციის გენერალური დირექტორი გოჩა მეზვრიშვილი.

შპს “საქაერონავიგაცია” საქართელოს საჰაერო სივრცეში ტრანზიტულ ხომალდებს 19 მარშრუტზე ემსახურება. ბოლო 4 წლის განმავლობაში დაემატა 6 ახალი საჰაერო მარშრუტი, რის შედეგადაც საქართველო სატრანზიტო კუთხით კიდევ უფრო მიმზიდველი გახდა ავიაკომპანიებისთვის.

 

იხილეთ ინფოგრაფიკა:

 

 

 

შპს “საქაერონავიგაცია” 2016 წელს

2016 წელი ეკონომიკისა და მდგრადი განვითარების სამინისტროს შპს „საქაერონავიგაციისათვის“ ინოვაციებისა და წარმატებული პროექტების წელი იყო. ფრენების მუდმივი ზრდის ტენდენცია კომპანიამ გამოწვევად მიიღო და გასულ წელს არაერთი უმნიშვნელოვანესი პროექტი განახორციელა, მათ შორის თბილისის საერთაშორისო აეროპორტის ასაფრენი ზოლის შუქ-ტექნიკური სისტემების რეაბილიტაცია, საჰაერო სივრცის დაზღვევა, თანამედროვე მეტეო რადიოლოკატორის დამონტაჟება, ახალი ავიამეთვალყურეების შერჩევა და სხვა.

  • დაზღვეული საჰაერო სივრცე

2016 წლის ერთ-ერთი ყველაზე მნიშვნელოვანი მოვლენა საქართველოს საჰაერო სივრცის დაზღვევაა. აღნიშნული პროექტი  თავისი მნიშვნელობით უპრეცედენტო და ამავდროულად, უდიდესი სახელმწიფოებრივი მნიშვნელობის აქტია, რომელიც საქართველოს მთავრობას ათავისუფლებს საქართველოს საჰაერო სივრცეში შესაძლო საავიაციო ინციდენტის შედეგად წარმოშობილი ფინანსური პასუხისმგებლობისგან ნახევარი მილიარდი აშშ დოლარის ფარგლებში, რაც შესაბამისად ქვეყნისთვის უდიდესი მატერიალური რესურსის დაზოგვას გულისხმობს.

საჰაერო სივრცის დაზღვევა

  • თბილისის საერთაშორისო აეროპორტის ასაფრენ-დასაფრენი ზოლის შუქ-ტექნიკური სისტემების რეაბილიტაცია

შოთა რუსთაველის სახელობის თბილისის საერთაშორისო აეროპორტს სარეაბილიტაციო სამუშაოების დასრულების შემდეგ სრულად განახლებული და მოდერნიზებული, საერთაშორისო სტანდარტებთან შესაბამისი, ICAO-ს სტანდარტების მეორე კატეგორიის შუქ-ტექნიკური საშუალებებით აღჭურვილი ასაფრენ-დასაფრენი ზოლი  და სამიმოსვლო ბილიკები აქვს.  საქაერონავიგაციამ განათების სისტემას 800 სანათი დაამატა და ახლა ასაფრენ-დასაფრენ ზოლს და სამიმოსვლო ბილიკებს სულ 1500-ზე მეტი სანათი ანათებს. განათების ახალი სისტემა კიდევ უფრო აამაღლებს ფრენების უსაფრთხოების დონეს საქართველოში და საჰაერო ხომალდებს, ძლიერი ნისლის, ცუდი მეტეოპირობებისა და მხედველობის დროს, აფრენა-დაფრენას საგრძნობლად გაუადვილებს. აგრეთვე მოიმატებს უსაფრთხოების დონე აეროდრომზე საჰაერო ხომალდების მანევრირებისას.

ასაფრენი ზოლის განათება

  • ICZ(ALES) –ის სარეზერვო სისტემა თბილისში

თბილისის საჰაერო მოძრაობის მართვის ცენტრში ჩეხურმა კომპანია ICZ(ALES)-მა საჰაერო მოძრაობის მართვის სარეზერვო სისტემა დაამონტაჟა, რომელიც კიდევ უფრო დაცული გახადა საქართველოს საჰაერო სივრცეს, რომელიც უკვე სამმაგად იქნება დაცული ნებისმიერი ტექნიკური შეფერხებისგან. ჩეხური წარმოების სარეზერვო სისტემამ ჩაანაცვლა  ამერიკული წარმოების სარეზერვო სისტემა, რომლის ექსპლუატაციის ვადა 2016 წლის ბოლოს ამოიწურა.

სიმულიატორი

  • INDRA-ს სარეზერვო სისტემა ქუთაისში

სარეზერვო სისტემა დამონტაჟდა ასევე ქუთაისშიც. ეს არის ძირითადი სისტემისგან დამოუკიდებელი რეზერვი, რომელიც უკვე სრულად გამორიცხავს სამუშაო პროცესის შეფერხებას. სარეზერვო სისტემა ქუთაისში  კომპანიას აძლევს საშუალებას, თბილისის ძირითადი საჰაერო მოძრაობის მართვის ცენტრთან კავშირის დაკარგვის შემთხვევაში (სტიქიური უბედურების ან გაუთვალისწინებელი ვითარების დადგომის დროს), შეყოვნების გარეშე გააგრძელოს საჰაერო ხომალდების სააერნაოსნო მომსახურება. ხაზგასასმელია ფაქტი, რომ საჰაერო მოძრაობის მართვის სარეზერვო ცენტრი საქართველოში პირველად შეიქმნა და ის თავისი ფუნქციით უნიკალურია. ზოგადად, თავისი ადგილმდებარეობითა და კლიმატური თვისებებით, ქუთაისის საერთაშორისო აეროპორტი იდეალური სარეზერვო აეროპორტია არა მარტო თბილისისთვის, არამედ მეზობელი ქვეყნებისთვისაც. ქუთაისის აეროპორტს აქვს შესაძლებლობა, რომ სატრანზიტო დერეფნის უმნიშვნელოვანესი წერტილი გახდეს. ასე რომ, აქ საჰაერო მოძრაობის მართვის სარეზერვო ცენტრის გამართვა არა მხოლოდ საქართველოსთვის, არამედ ამიერკავკასიის რეგიონისთვისაც არის მნიშვნელოვანი.

ქუთაისი

  • რადიოსადგურების სისტემა კახეთში

2016 წლის მაისში შპს „საქაერონავიგაციამ“ კახეთში (მთა ცივი) “მიწა-ჰაერის” ახალი სტაციონარული რადიოსადგურების სისტემა დაამონტაჟა, რომლის მეშვეობითაც დაბალ ეშელონზე (G კლასი) მფრენ მცირე ზომის საჰაერო ხომალდებთან ორმხრივი კავშირის დაამყარება პირველად გახდა შესაძლებელი. ცივ გომბორის მთიანი მასივი თბილისსა და კახეთს შორის უწყვეტი კავშირის დამყარებაში ბარიერს ქმნიდა და ამ ზონაში მფრენ მცირე ზომის ხომალდებთან დასაკავშირებლად 10-15 წუთი იყო საჭირო. ამგვარი კავშირის არსებობა მას შემდეგ გახდა აუცილებელი, რაც თავდაცვის სამინისტროს სსტც „დელტამ“  სეტყვის საწინააღმდეგო დანადგარი აამოქმედა.

 

  • ხმოვანი კავშირის ახალი სისტემა

გასული წლის ერთ-ერთი უმნიშვნელოვანესი პროექტია, ასევე, ხმოვანი კავშირის ახალი სისტემის დანერგვა, რომელიც შპს „საქაერონავიგაციამ“ იტალიური კომპანია “S.I.T.T.I. S.p.A”-სგან შეიძინა. უმაღლესი სტანდარტის, ახალი ხმოვანი კავშირის სისტემა შპს „საქაერონავიგაციას“ საშუალებას მისცემს უმოკლეს დროში პირდაპირი კავშირი დაამყაროს ავიამეთვალყურესა და მფრინავს შორის და კიდევ უფრო მაღალ დონეზე უზრუნველყოს ფრენების უსაფრთხოება საქართველოს საჰაერო სივრცეში.

logo_sitti

  • INDRA-ს სიმულატორი

საჰაერო მიმოსვლის მართვის პროცესში ავიამეთვალყურეთა მაღალი კვალიფიკაცია უმთავრესია. სამუშაოს სპეციფიკიდან გამომდინარე, თითქოს უმნიშვნელო შეცდომაც კი შესაძლოა ფატალური შედეგით დასრულდეს. ამის გამო, ავიამეთვალყურეთა პროფესიონალიზმს დიდი ყურადღება ექცევა. მეთვალყურეები მუდმივ წვრთნას გადიან იმისათვის, რომ მოულოდნელი სტრესული სიტუაცია, სადაც უსწრაფესი მოქმედებაა საჭირო, მათთვის სულაც არ აღმოჩნდეს უცხო და დამაბნეველი. ამიტომ, თეორიული ცოდნის გარდა, ავიამეთვალყურეები პერიოდულად პრაქტიკულ სწავლებას გადიან, რაც სიმულატორთან მუშაობას გულისხმობს. ამ შემთხვევაში, ისინი, ხელოვნურად შექმნილ სიტუაციაში მუშაობენ, სიმულირებულ მართვის პულტთან და საკუთარ თავზე გამოცდიან ყველა სტრესულ სიტუაციას, რომლის წინაშეც რეალურად შეიძლება აღმოჩდნენ.

გასულ წელს,  შპს „საქაერონავიგაციამ“ თბილისის საჰაერო მოძრაობის მართვის ცენტრში ექსპლუატაციაში მიიღო ესპანური კომპანია „INDRA SISTEMAS S.A” -ს წარმოების სიმულატორი, რომელიც სრულიად შეესაბამება, როგორც საერთაშორისო სტანდარტებსა და რეკომენდაციებს, ასევე საქართველოს ერთიანი ცის იმპლიმენტაციის გეგმას. INDRA-ს წარმოებული სისტემა თანამედროვე საჰაერო მოძრაობის მართვის ფუნქციებსა და დახვეწილ ინტერფეისს აერთიანებს. ესპანური კომპანიის წარმომადგენლები მონიტორინგს გაუწევენ სწავლების პროცესს.

გოჩა მეზვრიშვილი

  • ახალი ავიამეთვალყურეები

ფრენების გაზრდილი რაოდენობის გამო, „საქაერონავიგაციამ“ დამატებითი ავიამეთვალყურეების შესარჩევად ღია კონკურსი გამოაცხადა. რომლის საფუძველზეც შერჩეული იქნა 12 ავიამეთვალყურე –  7 თბილისში, 5 რეგიონებში. კონკურსში გამარჯვებულები პროფესიას ჩეხეთში, ევროპის ერთ-ერთ წამყვან საავიაციო უნივერსიტეტში ეუფლებიან.

შპს „საქაერონავიგაციამ“ ვაკანსია გამოაცხადა  საჰაერო მოძრაობის მართვის (AFIS) ოპერატორის პოზიციაზეც ამბროლაურის აეროპორტში, რომლის საფუძველზეც შეირჩა  4 კანდიდატი. ავიამეთვალყურეების მსგავსად, ისინიც ჩეხეთის საავიაციო სასწავლებელში გაივლიან სწავლებას.

აეროპორტის განათება

  • RDGE/25

2016 წლის ერთ-ერთი ყველაზე მნიშვნელოვანი მოვლენა „საქაერონავიგაციის“ საქმიანობაში საჰაერო მოძრაობის მარშრუტების განვითარების ჯგუფის (RDGE) 25-ე საიუბილეო შეხვედრა იყო. ოქტომბერში კომპანიამ სამოქალაქო ავიაციის საერთაშორისო ორგანიზაცია (ICAO) 70-ზე მეტ დელეგატს უმასპინძლა. RDGE 25 – ს იკაოს ევროპულ ბიუროში შემავალი ყველა ქვეყნის დელეგატი დაესწრო, მოწვეულ სტუმრებს შორის იყვნენ საერთაშორისო საავიაციო ორგანიზაციების, ასევე იკაოს სამი ოფისის (ევროპისა და ჩრდილო ატლანტიკური, ახლო აღმოსავლეთისა და სამხრეთ აფრიკის, აზიისა და წყნარი ოკეანის) წევრი სახელმწიფოების წარმომადგენლები. ასეთი მასშტაბის ღონისძიების საქართველოში ჩატარება კიდევ ერთხელ უსვამს ხაზს, რომ საქართველოს ხელისუფლების ძალისხმევა – მეტად განავითაროს საავიაციო ინდუსტრია ქვეყანაში, წარმატებული და შედეგიანია.

ICAO-ს პარიზის ოფისის რეგიონალურმა დირექტორმა ლუის ფონსეკა დე ალმეიდამ შპს “საქაერონავიგაციის” გენერალურ დირექტორს გოჩა მეზვრიშვილს განსაკუთრებული მადლობა გადაუხადა წარმატებულად ჩატარებული ღონისძიებისთვის.

შეხვედრის ფარგლებში საქაერონავიგაციამ ევროპული ბიუროს ქვეყნებს სამი ახალი მარშრუტი შესთავაზა. ახალი საჰაერო მარშრუტები გააერთიანებს ჩვენი რეგიონის რამდენიმე ქვეყანას და რეგიონალურ ჭრილში მოიზიდავს უფრო მეტ ავიაკომპანიას.

icao-letter

  • ფრენების გაზრდილი რაოდენობა

2016 წელს შპს “საქაერონავიგაცია” 128 126 საჰაერო ხომალდს მოემსახურა, რაც 6 %-ით მეტია გასულ წელთან შედარებით. გაიზარდა, საქართველოს აეროპორტებში მომფრენი და გამფრენი (24 480), ასევე სატრანზიტო რეისების (97 691) რაოდენობაც.

“საქაერონავიგაცია” საქართველოს საჰაერო სივრცეში ტრანზიტულ ხომალდებს 19 მარშრუტზე ემსახურება. ბოლო 4 წლის განმავლობაში დაემატა 6 ახალი საჰაერო მარშრუტი, რის შდეგადაც საქართველო სატრანზიტო კუთხით კიდევ უფრო მიმზიდველი გახდა ავიაკომპანიებისთის.

ევროკონტროლის მონაცემებით, ფრენების რაოდენობის ზრდა მომავალ წლებშიც შენარჩუნდება. ეს ტენდენცია მნიშვნელოვანი გამოწვევების წინაშე აყენებს კომპანიას. სწორედ ამიტომ, 2017 წელს კომპანიის პრიორიტეტად კვლავაც რჩება უახლესი, საერთაშორისო სტანდარტებთან შესაბამისი სისტემების ექსპლოატაცია და თანამშრომელთა კვალიფიკაციის დონის მუდმივი ზრდა.

12 ნოემბერი ინჟინერ/ტექნიკოსთა საერთაშორისო დღე

12 ნოემბერი ავიაციის სფეროში ინჟინერ/ტექნიკოსთა (ATSEP) საერთაშორისო დღეა. როდესაც ვსაუბრობთ ფრენების უსაფრთხოებაზე, ყოველთვის აღვნიშნავთ მფრინავებისა და ავიამეთვალყურეების დამსახურებას, თუმცა ხშირად გვავიწყდება საჰაერო მოძრაობის უსაფრთხოების ინჟინერ/ტექნიკოსები,  რომლებსაც უდიდესი წვლილი შეაქვთ უსაფრთხო ფრენების განხორციელების საქმეში.

საჰაერო მოძრაობის მართვისას უმნიშვნელოვანესია ტექნიკური უზრუნველყოფა, ფრენების უსაფრთხოებისათვის აუცილებელი სისტემების სპეციფიკაცია, ინსტალაცია, ინტეგრაცია, დაკალიბრება, ორგანიზება და მონიტორინგი. ამ ყველაფერს საქართველოში ეკონომიკისა და მდგრადი განვითარების სამინისტროს შპს „საქაერონავიგაციის“ ტექნიკური კომპლექსი უზრუნველყოფს, რომელიც არაერთი სამსახურისაგან შედგება.

ეს სამსახურებია:

  • ოპერატიული მართვის სამსახური;
  • საორგანიზაციო ტექნიკური საქმიანობის სამსახური;
  • ფრენების ელექტრო შუქ-ტექნიკური უზრუნველყოფის სამსახური;
  • რადიონავიგაციის სამსახური
  • კომუნიკაციების სამსახური
  • რადიოლოკაციის სამსახური
  • ინფორმაციული ტექნოლოგიების სამსახური
  • ავტომატიზირებული მართვის სისტემების სამსახური
  • შიდა მონიტორინგის ჯგუფი

 

თითოეული ამ სამსახურის გარეშე საჰაერო მოძრაობის მართვა და ფრენების უსაფრთხოების უზრუნველყოფა შეუძლებელი იქნებოდა.   მაგალითად, რადიოლოკაციის სამსახური საქართველოს საჰაერო სივრცის ფარგლებში საჰაერო მოძრაობის მართვის მომსახურებას საიმედო  და ზუსტი რადიოლოკაციური ინფორმაციით უზრუნველყოფს.

senaki

ყველა ის ინფორმაცია, რომელიც ავიამეთვალყურეს  საჰაერო მიმოსვლის მართვის უზუნველსაყოფად ჭირდება, იქნება ეს სალოკაციო ინფორმაცია, მეტეოროლოგიური თუ სხვა, ავტომატიზირებული მართვის სისტემების სამსახურში იყრის თავს. ეს უკანასკნელი სალოკაციო და საფრენოსნო ინფორმაციის უწყვეტი და უხარვეზო დამუშავებასა და საჰაერო მეთვალყურეების სამუშაო ადგილებზე ოპერატიულად მიწოდებას უზრუნველყოფს.

თვითმფრინავის უსაფრთხო აფრენა-დაფრენაზე,  რადიონავიგაციის სამსახური ზრუნავს. ეს სამსახური პასუხისმგებელია ისეთი ტექნოლოგიების დანერგვასა და გამართული მუშაობის უზრუნველყოფაზე, რომელიც ეხმარება საჰაერო ხომალდს განახორციელოს ზუსტი და უსაფრთხო ფრენა. მაგალითად, ინსტრუმენტალური დაშვების სისტემა (ILS) წარმოადგენს თვითმფრინავის „გზამკვლევს“. ის უზრუნველყოფს, რომ საჰაერო ხომალდმა ავტომატურ რეჟიმში უსაფრთხოდ განახორციელოს ზუსტი დაფრენა.

ils1

თვითმფრინავის გზამკვლევია,  ასაფრენ-დასაფრენ ბილიკზე დამონტაჟებული შუქ-ტექნიკა, რომლის გარეშეც ფრენა წარმოუდგენელია, ღამით და დაბალი ხილვადობის დროს. გარდა ამისა, ფრენების ელექტრო შუქ-ტექნიკური უზრუნველყოფის სამსახური შპს „საქაერონავიგაციის“ ყველა ობიექტის გარანტირებულ  და საიმედო ელექტრო მომარაგებაზე ზრუნავს.

14732309_1541610812523024_2236103391929616780_n

საჰაერო მოძრაობის მართვისას ძირითადი საშუალება რადიოკავშირია, რომელიც წარმოადგენს „მიწა-ჰაერი“-ს ტიპის კავშირს ავიამეთვალყურესა და საჰაერო ხომალდის ეკიპაჟს შორის, განხორციელებულს ულტრამოკლე ტალღოვან სპექტრულ დიაპაზონში.  მაღალხარისხიანი,  უწყვეტი და საიმედო საავიაციო კავშირებით უზრუნველყოფა შპს „საქაერონავიგაციის“ კომუნიკაციების სამსახურის პრეროგატივაა.

უმნიშვნელოვანესი ფუნქცია აქვს, ასევე, ოპერატიული მართვის სამსახურს, რომელიც ტექნიკური კომპლექსის და საჰაერო მოძრაობის მართვის სამსახურებს შორის ოპერატიული საქმიანობის კოორდინაციას და ტექნიკური კომპლექსის ოპერატიული ცვლების მუშაობის კონტროლს უზრუნველყოფს. ოპერატიული მართვის სამსახურის ცვლის უფროსებს უშუალო კონტაქტი აქვთ ფრენების ხელმძღვანელთან. მათი პასუხისმგებლობაა ნებისმიერი ტექნიკური ხარვეზის დაუყოვნებლივ აღმოფხვრა, რომელიც შეიძლება წარმოიშვას საჰაერო მოძრაობის მართვის პროცესში.

ინფორმაციული ტექნოლოგიების სამსახური ლოკალური ქსელის ინფრასტრუქტურის და ინტერნეტ კავშირის მართვასა და ზედამხედველობაზეა პასუხისმგებელი.

ყველა ამ სამსახურის ცენტრალიზებული და ერთგვაროვანი მუშაობის კოორდინაციას და გაწეული მომსახურების ანალიზს საორგანიზაციო ტექნიკური საქმიანობის სამსახური უზრუნველყოფს. ტექნიკური კომპლექსის სამსახურების საექსპლუატაციო-ტექნიკური დოკუმენტაციის მონიტორინგს კომპანიის შიდა მონიტორინგის ჯგუფი ახორციელებს.

ტექნიკური კომპლექსის ყველა თანამშრომელი მაღალკვალიფიციური სპეციალისტია. ისინი უწყვეტ რეჟიმში მუშაობენ შპს „საქაერონავიგაციის“ უმთავრესი მისიის, ფრენების უსაფრთხოების უზრუნველსაყოფად. კომპანიის მენეჯმენტის მხარდაჭერით, ინჟინერ/ტექნიკოსები მუდმივად გადიან სწავლებისა და გადამზადების სხვადასხვა კურსებს, რათა მათი პროფესიონალიზმი შესაბამისობაში იყოს საერთაშორისო სტანდარტებთან.

12 ნოემბერი კიდევ ერთხელ გვახსენებს, რომ არსებობენ საავიაციო სპეციალისტები, სამსახურები და ჯგუფები, რომლებიც ყოველდღიურად, 24 საათის განმავლობაში კოორდინირებულად მუშაობენ და ზრუნავენ იმაზე, რომ საჰაერო ხომალდები დანიშნულების ადგილამდე უსაფრთხოდ, ყოველგვარი საავიაციო ინციდენტის გარეშე გადაადგილდნენ. საქართველოს საჰაერო სივრცეში თითოეული უსაფრთხოდ განხორციელებული ფრენა ტექნიკური კომპლექსის თავდაუზოგავი და ურთიერთშეთანხმებული მუშაობის შედეგია.

 

შპს „საქაერონავიგაცია“ლვოვის საჰაერო მოძრაობის მართვის ცენტრის გახსნის ცერემონიაზე

უკრაინის საჰაერო ნავიგაციის სერვისის პროვაიდერის (UkSATSE) მოწვევით, 26 აგვისტოს ეკონომიკისა და მდგრადი განვითარების სამინისტროს შპს „საქაერონავიგაციის“ დელეგაცია  ლვოვის საჰაერო მოძრაობის მართვის ახალი რეგიონალური ცენტრის გახსნის ცერემონიას დაესწრო.

ლვოვში საჰაერო მოძრაობის მართვის ახალი ცენტრის მშენებლობა  2013 წელს დაიწყო. სამშენებლო სამუშაოების დასრულების შემდეგ, რეგიონალურ ცენტრში დამონტაჟდა თანამედროვე საჰაერო მოძრაობის მართვის სისტემა (Roksolana).

“ვულოცავ, უკრაინას ახალი რეგიონალური მართვის ცენტრის გახსნას, რაც კიდევ უფრო აამაღლებს ფრენის უსაფრთხოების დონეს ქვეყანაში. საქაერონავიგაცია წლებია თანამშრომლობს უკრაინელ კოლეგებთან. ჩვენი მჭირდო, მეგობრული ურთიერთობა საშუალებას გვაძლევს გავუზიაროთ ერთმანეთს ცოდნა და გამოცდილება და ამით, კიდევ უფრო ავამაღლოთ ჩვენი კომპანიების მომსახურების ხარისხი.“ – განაცხადა შპს „საქაერონავიგაციის“ გენერალურმა დირექტორმა გოჩა მეზვრიშვილმა.

ლვოვის რეგინალური მართვის ცენტრი საჰაერო სივრცეს უკრაინის  რვა რეგიონში აკონტროლებს. დღეისათვის ის აღჭურვილია საერთაშორისო სტანდარტებით აღიარებული სისტემებითა და სანავიგაციო საშუალებებით.