თბილისის საერთაშორისო აეროპორტში დღის საათებში ფრენა შეიზღუდება

თბილისის საერთაშორისო აეროპორტში, ასაფრენი ზოლის სარეაბილიტაციო სამუშაოების გამო, დღის საათებში ფრენა 4 თვის განმავლობაში შეიზღუდება.

1 მარტიდან 26 მარტამდე ფრენები შეიზღუდება  დილის 09:30-საათიდან  შუა დღის 03:00-საათამდე, ხოლო 27 მარტიდან 1  ივლისამდე: დილის 10:30-საათიდან საღამოს 08:00-საათამდე.  სამუშაოების დასრულების შემდეგ, თბილისის საერთაშორისო აეროპორტს ექნება განახლებული, უმაღლესი სტანდარტების ასაფრენი ზოლი და მოდერნიზებული სამიმოსვლო ბილიკების სისტემა, რომელიც ხელს შეუწყობს როგორც ახალი ავიაკომპანიების ბაზარზე შემოსვლას, ასევე, მგზავრთნაკადის სამომავლო ზრდას.  განახლებული ასაფრენი ზოლი შპს „საქაერონავიგაციის“ მიერ უახლესი, საერთაშორისო სტანდარტებთან შესაბამისი, შუქ-ტექნიკური საშუალებებით აღიჭურვება.

შპს „საქაერონავიგაციაში“ სამეთვალყურეო საბჭოს სხდომა გაიმართა

საქართველოს ეკონომიკისა და მდგრადი განვითარების სამინისტროს შპს „საქაერონავიგაციაში“ სამეთვალყურეო საბჭოს სხდომა გაიმართა. სხდომას ესწრებოდნენ შპს „საქაერონავიგაციის“ სამეთვალყურეო საბჭოს წევრები – დავით ხუციშვილი, დავით ებრალიძე და გიორგი თაბუაშვილი, შპს „საქაერონავიგაციის“ გენერალური დირექტორი გოჩა მეზვრიშვილი და კომპანიის სხვა წარმომადგენლები.

საქაერონავიგაცია

საქაერონავიგაციის თანამშრომლებმა სამეთვალყურეო საბჭოს წევრებს კომპანიის ფინანსური ანგარიშგების შესახებ ინფორმაცია მიაწოდეს. შეხვედრაზე განიხილეს შპს „საქაერონავიგაციის“ 2016 წლის ბიზნეს-გეგმა და 2015 წლის ბიუჯეტის ფაქტობრივი შესრულების საკითხი. კომპანიის ფინანსების მართვის საკითხების მენეჯერმა, ირაკლი ზაქარეიშვილმა, საბჭოს წევრებს არასახელმწიფო საპენსიო დაზღვევისა და უზრუნველყოფის სამოქმედო გეგმა გააცნო, რომელიც 2016 წლიდან შპს „საქაერონავიგაციის“ თანამშრომელების საპენსიო დაზღვევით უზრუნველყოფას ითვალისწინებს.

ირაკლი ზაქარეიშვილი

სამეთვალყურეო საბჭოს წევრებმა მოისმინეს ინფორმაცია იმ ახალი ტექნოლოგიების შესახებ, რომლებიც კომპანიაში ინერგება. სხდომაზე, ასევე, განხიხილეს მიმდინარე სამშენებლო პროექტები და თბილისის აეროპორტის ასაფრენი ზოლისა და სამიმოსვლო ბილიკების მეორე კატეგორიის შუქ-ტექნიკური საშუალებებით აღჭურვის საკითხი.