ერთი წლის წინ, დავით აღმაშენებლის სახელობის ქუთაისის საერთაშორისო აეროპორტის საზეიმო გახსნის ცერემონია გაიმართა. გაიხსნა აეროპორტის ტერმინალი და პირველი საერთაშორისო ფრენაც განხორციელდა. ფრენა ავიაკომპანია Wizz Air-მა შეასრულა.
ამ ერთი წლის განმავლობაში ქუთაისის საერთაშორისო აეროპორტს დაემატა ახალი რეისები, გაიზარდა მგზავრთა რაოდენობა. პარალელურად მიმდინარეობდა ქუთაისის სამეთვალყურეო კოშკისა და საქაერონავიგაციის ადმინისტრაციული შენობის მშენებლობა. თუმცა, საჰაერო ხომალდების უსაფრთხო გადაადგილებისათვის ახალი ტაუერის მშენებლობას ხელი არ შეუშლია, რადგან საჰაერო მიმოსვლის მართვა საქაერონავიგაციის კუთვნილი, მობილური სამეთვალყურეო კოშკიდან ხორციელდებოდა.
ამჟამად, აეროპორტის გახსნიდან ერთი წლის თავზე, ქუთაისის ტაუერის მშენებლობა დასრულებულია. ქვეყანაში მიმდინარე პოლიტიკურმა ცვლილებებმა გავლენა არ იქონია პროექტის დასრულებაზე. 2013 წლის თებერვლიდან ინტენსიური შიდასარემონტო სამუშაოები განაახლა კომპანია „მშენებელი 2004“-მა.
დღეისათვის მიმდინარეობს ტაუერის აღჭურვა ჩეხური კომპანია ALES-ის ტიპის სისტემით. ასევე კოშკის ფასადზე ლედ განათების დამონტაჟებას აგრძელებს შპს „ელმშენი 77“. პროექტის სრულყოფა კვლავ ჰოლანდიური არქიტექტურული კომპანია „UNStudio“-ს ზედამხედველობის ქვეშ მიმდინარეობს.
ახალდამთავრებული სამეთვალყურეო კოშკისა და ადმინისტრაციული შენობის გახსნა სარემონტო სამუშაოების სრული დასრულების შემდეგ იგეგმება. ავიამეთვალყურეები ახლა უფრო კომფორტული გარემოდან შეძლებენ თვითმფრინავების უსაფრთხო მოძრაობის უზრუნველყოფას.